Vajza pa fytyrë

“Vajza pa fytyrë më ka mbajtur me frymën pezull nga fillimi në fund.” – Michael Connelly

Asnjë shkak të arsyeshëm, asnjë armë krimi. Rasti ideal për ta përfshirë Herri Holin në një hetim me zhvillime të papritura. Qyteti i Oslos është kredhur në një shtresë të trashë dëbore dhe të gjithë, si çdo vit, presin me padurim Krishtlindjen. Ushtria e Shpëtimit punon me ritëm të lartë për të mbledhur fonde për narkomanët, refugjatët dhe të pastrehët, ndërsa qytetarët bujarë nxitojnë të bëjnë dhurime për t’u ndier në paqe me ndërgjegjen. Vetëm Herri Holi nuk e vë re këtë “vërshim” mirësie që e rrethon: mendja i punon ethshëm, si gjithnjë, tek uiski. Por, kur gjatë një koncerti bamirësie, një anëtar i Ushtrisë së Shpëtimit ekzekutohet në mes të turmës, komisari vendos të merret me hetimin. Dhe në gjurmët e një vrasjeje të paskrupullt, edhe këtë herë Herri Holi do të zhytet në skutat më të errëta dhe më befasuese të shpirtit njerëzor.